Psa 80 | TUCO | STEP | Mbouŋ to Asap O Maaron, yom ŋginiiŋ to yei Israela, ve yei sipsip tiom. Yom to umuŋmuuŋ pa yei papaghu to Yosep. Ughur taliŋam pa suŋuuŋ tiei tonene. Yom unepneep ila inam to ghamuuŋ pooz to ineep izala aŋela ariaŋadi avaradi Upatooŋ ŋgurubam ivot ighazooŋ payei.

aIgham 15:17; Is 5:1-7; Mt 21:33+; Mbaŋ 7:45

Psalms 80

Yes Israela tighason Maaron pa iuul di, leso tineep poia muul

Mbouŋ to Asap

1 O Maaron, yom ŋginiiŋ to yei Israela, ve yei sipsip tiom.
Yom to umuŋmuuŋ pa yei papaghu to Yosep. Ughur taliŋam pa suŋuuŋ tiei tonene.
Yom unepneep ila inam to ghamuuŋ pooz to ineep izala aŋela ariaŋadi avaradi
Upatooŋ ŋgurubam ivot ighazooŋ payei.
2 Yom ariaŋam ve tapirim tiina.
Umundig ve upatooŋ tapirim ila Epraim, Benyamin, ve Manase papaghu todi matadi.
Unum uul ghei.
3 O Maaron, uul ghei ve upalot ghei.
Lolom poia payei, ve ugham poian ghei. Leso nineep poia muul.
4 O Yoova, yom Maaron ariaŋam kat, ve uŋgin mbeb tisob.
Yei tamtoghon tiom. Eemoghon atem yabyab payei, ve ulooŋ suŋuuŋ tiei maau.
Pale ŋeez o mbalmbali tiom isob?

5 Yom ugham ghei nimbaad pataŋani tiina le isooŋ katin ghei.
Tovenen nitaŋ tiina, ve nighun matamai suru inim ya payei.

6 Yom upul murim payei. Tovenen ndug ndug to tineep tigharau ghei, tiwazoran di pa taan tiei tighaze tighami inim ledi.
Ve koiamai tiveveleg ghei, ve tiŋiŋiŋ payei.
7 Yom Maaron ariaŋam kat, ve uŋgin mbeb tisob. Uul ghei ve upalot ghei.
Lolom poia payei, ve ugham poian ghei. Leso nineep poia muul.
8 Muuŋ, ai vaen eez iyoon ila taan to yes Isipa.
Yom ugheli iza, ve ughami inim sualen, ve undiir ndug tonene tamtoghona tighau, ve uvazogi ila taan todi. ^a

9 Ve undeeb pughu, leso itub pooi.
Tovenen waria izila taan lolo kat, ve boga titub tila mamala, le titatab taan tonene isob.

10 Ai vaen tonene itub iza iza, le itatab lolooz to ndug tonene paam, ve inim yavyaav padi.
Ve ai mendepur tintina tiyoon ila samba paam.

11 Boga pida titub tivot tila mala, le tivot naari to te Mediterenian.
Ve pida titub tila le peria ila ya tiina Euprates.
12 Pughu vena to aazne ureu didiiŋ to muuŋ iluvut uum vaen tiom?
Ughita. Tamtoghon to tilaghlaagh sorok, tisob tinim tilooŋ tila, ve tiyubyub anoŋa.

13 Ve ŋgai sagsag tisusus pughu ve tivazagi, ve mbeb naol to su tighanghan anoŋa.
14 O Maaron, yom ariaŋam kat, ve uŋgin mbeb tisob. Matam imuul inim payei.
Uneep sambam, ve matam izi inim ughita ai vaen to nimam waan ivazogi. Isami wa!
Tovenen unum ugharaata! Leso itub pooi muul.

16 Aazne, koiamŋa tiŋgor ai vaen tiom izi, ve tisuruuva izala yab.
Ughita di ve uyaan di, ve upasob di tilaledi!
17 Eemoghon ŋgeu tiom to ineep ila nimam waan, uŋgin poiani ila nimam samba.
Kinik tiei to yom taum usia, ve ughuri pa uraat, matam pani ve upaloti. Leso igham uraat payom.

18 Ighaze ugham tovene, yei irau nipul murimai payom muul maau.
Tovenen uul ghei nineep poia muul. Leso nimbees payom, ve nipait izam.

19 O Yoova, yom Maaron ariaŋam kat ve uŋgin mbeb tisob. Uul ghei ve upalot ghei.
Lolom poia payei, ve ugham poian ghei. Leso nineep poia muul.